今年教育部閩南語語言能力認證考試按算對108年4月12早起9點開始開放「網路報名」,時間到5月初10下晡5點為止。無限定身份,逐家攏通參加。報名費是250箍,19歲以下免費。有參加這擺的認證考試,若通完成所有的測驗(聽、講、讀、寫4項),就會當得著1份獎勵品(包括特製的環保桌苴仔、飲料捾袋仔);較早捌考過,這擺閣來挑戰,若有才調閣進步一級的,另外猶有大禮欲來相送喔,向望逐家相招來參加!
為著欲推廣咱的閩南語,鼓勵全民學習,教育部佇99年開始辦理認證考試,到今超過6萬7,000外人報名囉。根據這幾冬的資料,逐冬攏有萬外人來報名,而且團體報名的人嘛愈來愈興,尤其是舊年團體報名的情形上濟,有682組,人數占欲所有報名人額的41%矣!
認證考試的網站有提供一个「自學資源」專區,特別是「學習地圖」已經整合基礎級到進階級的參考資料,歡迎逐家使用。若是以早毋捌考過的民眾,想欲了解題型佮考試的方式,會當佇「自學資源」佮「文件下載」區,揣「試題說明佮範例」(有聲音檔)來練習。
咱的認證考試,毋但會使當做教學人員試驗家己語言能力的一種工具,嘛通成做一種全民活動,向望逐家阿母招阿爸,樓頂招樓跤,大人囡仔相𤆬來試一下仔鹹汫,予咱的本土語言文化會當釘根,萬代生湠。
最後,認證考試的網站(https://blgjts.moe.edu.tw/)就有簡章通掠,敬請參考。若猶有其他針對考試的問題,才請聯絡承辦單位國立臺灣師範大學。服務專線:0800-699-566、(02)2321-0191;服務信箱:blg.sce@deps.ntnu.edu.tw。
聲音檔 https://language.moe.gov.tw/upload/download/jts/other/blgregister.mp3