今年的教育部「閩南語語言能力認證考試」按算107年8月11（拜六）早起9點佇全國18个考區、36間學校同齊舉辦。這擺的考試攏總有1萬591个人報名，其中歲聲上濟的有78矣，上細漢的是6歲，猶閣有對韓國、美國、馬來西亞等無仝國家來的考生，嘛欲做伙來試鹹汫。
對今年開始，19歲以下的考生免費，所以就加真濟人報欲考A卷，成長率達到148％，佮舊年比起來，7歲到12歲的就加欲900外人。另外，今年團體報名的就有655組，並舊年猶較濟，加61組。其中臺南市海佃國中團報的人數上濟，攏總有310人，拚過家己舊年156位的紀錄。今年閣有8年仔的學生報考B卷，學校表示：「為著欲鼓舞8年仔的學生學家己的母語，學校開選修課予學生囡仔用參與社團的方式來學，參加的學生齊是本底就對閩南語有興趣的，自動加入社團學家己的母語，拍算今年就欲來挑戰中級。」
這擺的考試按算今年10月22早起9點開放網路就通查成績，同時嘛會寄成績單通知，若考生到10月26猶未收著的，才請佮承辦單位國立臺灣師範大學聯絡；準若對家己的成績有掛疑的，請佇107年10月22到10月26，用紙本寄批申請複查。考生的成績若有達到分級標準的，就通收著認證證書（大概今年10月29就會寄）。以上的資訊，攏通佇107年閩南語語言能力認證考試網站（http://blgjts.moe.edu.tw）查著，嘛會當敲服務專線0800-699566聯絡承辦單位。
閩南語語言能力認證毋但會用得當做教學人員訓練家己語言能力的工具，嘛通成做一種全民的活動，向望逐家阿母招阿爸，樓頂招樓跤，大大細細鬥陣來參加，予咱本土的語言文化會當釘根，萬代生湠。